رسالة حب/ بقلم. مصطفى فريد

رسالة حب
من ديوان/ سنين المخاض

رسالة حب كتبها القلب
بكل الشوق اللى فى وجدانى
لنهر الحب واطهر قلب
لنور الفجر اللى بيرعانى
اول سطر با اقول لك فيه
إنك وحشانى
وحشنى الضمه لصدرك يامه
وحشنى اللمه وصوتك لما
كنت في حجرك بتغنيلى
وتشاغلينى بلمسة كفك
وتضمينى لغاية قلبى مايلمس قلبك
اسمع نبضك
لحن بيسرى جوه حشايا
يرسم نغمة صوتك آيه
شوق جوايا يدوب فى ربيعك
يجري بلهفه ويقطف وردك
من فوق خدك
آه ياامايا
لسه فى دمى بقايا حكايا
عايزه حكايه
شايفه الجنه زى ماحدتيها معايا
شوفتى النخل الطارح نور
والأنهار وبنات الحور
عايز كل الحاصل عندك
تكتبهولى يغاليه فى ردك
عارفه يا أمى
لسه انا حاسس طيبة قلبك
وحنان حضنك
يوم ماشقاوتى غصب عنى جرحت ايدى
شفت فى عينك نهر دموعك بيغرقنى
فى ضمة حب وحضن حرير
قلبى بلهفه عليكى يطير
وان جه يوم مره وزعلتك
كنتى تسامحى بقلب كبير
فاكر لما
كنت اكتب لك حرفين اسمك بالطباشير
وانتى تلفى ورايا البيت
خايفه على
وقلبك لى بيدعى ويحلم ابقى كبير
وادينى حبيت وكبرت فى صدرك
لكن برضوا  بشوفنى فى حضنك
لسه صغير
مش ح اتغير
ياأم القلب الهادى الطيب
جى قريب
ومهما تطول الغربة مابينا
جايلك ------    جايلك
جاى وشايلك يا امه هديه
فى أول عيد بيمر على
وانتى بعيد -------- بس اكيد
فى لحظه فى ساعه فى يوم ح اوصلك
لما المركب توصل برك
واخلع عنى عباية الغمة
وكل آدان أبعتلك يامه
فاتحه وآيه وبوسه وضمه
سلام وتحية
لأعظم أم وأغلى هديه
ومسك ختام
المرسل ابنك
والعنوان
بميدان احسانك
شارع حبك
عطفة ودك
منزل قلبك
اول دور