جنوني في حبك حياه / بقلم أيمن بلال

 .. جنوني ف حبك حياه ..

ف حبك مباح النظرة والسكات

والكلام ف الهوي والعشق حياه

وأنا عاشق ف حبك عاش ساعات

ما بين حلمه وعلمه وخوفه تاه 

ياكتاب في الحب تاهت سطوره

فتحته ف ليل غاب عني نوره

فيه كلام صعب عاللسان يقوله

بس جوا القلب حب فوق الحياه

أجيلك وف قلبي م الشعر بيت

بيقولك أنا العاشق إللي حبيت

وبعده كل كلام الهوى بيه جيت

ولما شفتك صوتي الصمت كساه

شفتك حلم وإيديكي وخداني

في عالم فيه الحب شكل تاني

دنيا تاهت عنها دموعي وأحزاني

وكل إللي إتمناه عمري قلبي لقاه

تمدي إيدك يمتد عمري معاكي

تبتسمي يبتسم زماني لهواكي

تقربي يدوب البدن بين إيديكي

وأتنفس منك زمن من زماني تاه

أنا إللي كنت مستني مني تقربي

سنين جنبك وعن أيامي تتغربي

أقرب منك وألقاكي عني بتهربي

عشقتك حياه وعمر عينيكي هواه

آخر كلامي كان ندا وصرخة حب

تقولك بحبك وبأحلم بيوم القرب

ياواخدة زماني معاه الحلم والقلب

ياحكاية الجنون فيها أحلي حياه

..... أيمن بلال ....